ספר ויקרא יחידה 5

A יא:א וידבר יהוה אל משה ואל אהרן לאמר אלהם יא:ב דברו אל בני ישראל לאמר זאת החיה אשר תאכלו מכל הבהמה אשר על הארץ יא:ג כל מפרסת פרסה ושסעת שסע פרסת מעלת גרה בבהמה אתה תאכלו יא:ד אך את זה לא תאכלו ממעלי הגרה וממפרסי הפרסה את הגמל כי מעלה גרה הוא ופרסה איננו מפריס טמא הוא לכם יא:ה ואת השפן כי מעלה גרה הוא ופרסה לא יפריס טמא הוא לכם יא:ו ואת הארנבת כי מעלת גרה הוא ופרסה לא הפריסה טמאה הוא לכם יא:ז ואת החזיר כי מפריס פרסה הוא ושסע שסע פרסה והוא גרה לא יגר טמא הוא לכם יא:ח מבשרם לא תאכלו ובנבלתם לא תגעו טמאים הם לכם

A יא:כד ולאלה תטמאו כל הנגע בנבלתם יטמא עד הערב יא:כה וכל הנשא מנבלתם יכבס בגדיו וטמא עד הערב יא:כו לכל הבהמה אשר הוא מפרסת פרסה ושסע איננה שסעת וגרה איננה מעלה טמאים הם לכם כל הנגע בהם יטמא יא:כז וכל הולך על כפיו בכל החיה ההלכת על ארבע טמאים הם לכם כל הנגע בנבלתם יטמא עד הערב יא:כח והנשא את נבלתם יכבס בגדיו וטמא עד הערב טמאים המה לכם {ס}

B יא:ט את זה תאכלו מכל אשר במים כל אשר לו סנפיר וקשקשת במים בימים ובנחלים אתם תאכלו יא:י וכל אשר אין לו סנפיר וקשקשת בימים ובנחלים מכל שרץ המים ומכל נפש החיה אשר במים שקץ הם לכם יא:יא ושקץ יהיו לכם מבשרם לא תאכלו ואת נבלתם תשקצו יא:יב כל אשר אין לו סנפיר וקשקשת במים שקץ הוא לכם

B יא:כט וזה לכם הטמא בשרץ השרץ על הארץ החלד והעכבר והצב למינהו יא:ל והאנקה והכח והלטאה והחמט והתנשמת יא:לא אלה הטמאים לכם בכל השרץ כל הנגע בהם במתם יטמא עד הערב

C יא:יג ואת אלה תשקצו מן העוף לא יאכלו שקץ הם את הנשר ואת הפרס ואת העזניה יא:יד ואת הדאה ואת האיה למינה יא:טו את כל ערב למינו יא:טז ואת בת היענה ואת התחמס ואת השחף ואת הנץ למינהו יא:יז ואת הכוס ואת השלך ואת הינשוף יא:יח ואת התנשמת ואת הקאת ואת הרחם יא:יט ואת החסידה האנפה למינה ואת הדוכיפת ואת העטלף

C יא:לב וכל אשר יפל עליו מהם במתם יטמא מכל כלי עץ או בגד או עור או שק כל כלי אשר יעשה מלאכה בהם במים יובא וטמא עד הערב וטהר יא:לג וכל כלי חרש אשר יפל מהם אל תוכו כל אשר בתוכו יטמא ואתו תשברו יא:לד מכל האכל אשר יאכל אשר יבוא עליו מים יטמא וכל משקה אשר ישתה בכל כלי יטמא יא:לה וכל אשר יפל מנבלתם עליו יטמא תנור וכירים יתץ טמאים הם וטמאים יהיו לכם יא:לו אך מעין ובור מקוה מים יהיה טהור ונגע בנבלתם יטמא יא:לז וכי יפל מנבלתם על כל זרע זרוע אשר יזרע טהור הוא יא:לח וכי יתן מים על זרע ונפל מנבלתם עליו טמא הוא לכם {ס}

D יא:כ כל שרץ העוף ההלך על ארבע שקץ הוא לכם יא:כא אך את זה תאכלו מכל שרץ העוף ההלך על ארבע אשר לא כרעים ממעל לרגליו לנתר בהן על הארץ יא:כב את אלה מהם תאכלו את הארבה למינו ואת הסלעם למינהו ואת החרגל למינהו ואת החגב למינהו יא:כג וכל שרץ העוף אשר לו ארבע רגלים שקץ הוא לכם

D יא:לט וכי ימות מן הבהמה אשר היא לכם לאכלה הנגע בנבלתה יטמא עד הערב יא:מ והאכל מנבלתה יכבס בגדיו וטמא עד הערב והנשא את נבלתה יכבס בגדיו וטמא עד הערב

יא:מא וכל השרץ השרץ על הארץ שקץ הוא לא יאכל יא:מב כל הולך על גחון וכל הולך על ארבע עד כל מרבה רגלים לכל השרץ השרץ על הארץ לא תאכלום כי שקץ הם

יא:מג אל תשקצו את נפשתיכם בכל השרץ השרץ ולא תטמאו בהם ונטמתם בם יא:מד כי אני יהוה אלהיכם והתקדשתם והייתם קדשים כי קדוש אני ולא תטמאו את נפשתיכם בכל השרץ הרמש על הארץ יא:מה כי אני יהוה המעלה אתכם מארץ מצרים להית לכם לאלהים והייתם קדשים כי קדוש אני יא:מו זאת תורת הבהמה והעוף וכל נפש החיה הרמשת במים ולכל נפש השרצת על הארץ יא:מז להבדיל בין הטמא ובין הטהר ובין החיה הנאכלת ובין החיה אשר לא תאכל {פ}