ספר דברים יחידה 8

i A כא:י כי תצא למלחמה על איביך ונתנו יהוה אלהיך בידך ושבית שביו כא:יא וראית בשביה אשת יפת תאר וחשקת בה ולקחת לך לאשה כא:יב והבאתה אל תוך ביתך וגלחה את ראשה ועשתה את צפרניה כא:יג והסירה את שמלת שביה מעליה וישבה בביתך ובכתה את אביה ואת אמה ירח ימים ואחר כן תבוא אליה ובעלתה והיתה לך לאשה כא:יד והיה אם לא חפצת בה ושלחתה לנפשה ומכר לא תמכרנה בכסף לא תתעמר בה תחת אשר עניתה {ס}

i A כב:יג כי יקח איש אשה ובא אליה ושנאה כב:יד ושם לה עלילת דברים והוצא עליה שם רע ואמר את האשה הזאת לקחתי ואקרב אליה ולא מצאתי לה בתולים כב:טו ולקח אבי הנער ואמה והוציאו את בתולי הנער אל זקני העיר השערה כב:טז ואמר אבי הנער אל הזקנים את בתי נתתי לאיש הזה לאשה וישנאה כב:יז והנה הוא שם עלילת דברים לאמר לא מצאתי לבתך בתולים ואלה בתולי בתי ופרשו השמלה לפני זקני העיר כב:יח ולקחו זקני העיר ההוא את האיש ויסרו אתו כב:יט וענשו אתו מאה כסף ונתנו לאבי הנערה כי הוציא שם רע על בתולת ישראל ולו תהיה לאשה לא יוכל לשלחה כל ימיו {ס} כב:כ ואם אמת היה הדבר הזה לא נמצאו בתולים לנער כב:כא והוציאו את הנער אל פתח בית אביה וסקלוה אנשי עירה באבנים ומתה כי עשתה נבלה בישראל לזנות בית אביה ובערת הרע מקרבך {ס}

i A כד:א כי יקח איש אשה ובעלה והיה אם לא תמצא חן בעיניו כי מצא בה ערות דבר וכתב לה ספר כריתת ונתן בידה ושלחה מביתו כד:ב ויצאה מביתו והלכה והיתה לאיש אחר כד:ג ושנאה האיש האחרון וכתב לה ספר כריתת ונתן בידה ושלחה מביתו או כי ימות האיש האחרון אשר לקחה לו לאשה כד:ד לא יוכל בעלה הראשון אשר שלחה לשוב לקחתה להיות לו לאשה אחרי אשר הטמאה כי תועבה הוא לפני יהוה ולא תחטיא את הארץ אשר יהוה אלהיך נתן לך נחלה {ס}

ii כא:טו כי תהיין לאיש שתי נשים האחת אהובה והאחת שנואה וילדו לו בנים האהובה והשנואה והיה הבן הבכר לשניאה כא:טז והיה ביום הנחילו את בניו את אשר יהיה לו לא יוכל לבכר את בן האהובה על פני בן השנואה הבכר כא:יז כי את הבכר בן השנואה יכיר לתת לו פי שנים בכל אשר ימצא לו כי הוא ראשית אנו לו משפט הבכרה {ס}

ii כב:כב כי ימצא איש שכב עם אשה בעלת בעל ומתו גם שניהם האיש השכב עם האשה והאשה ובערת הרע מישראל {ס} כב:כג כי יהיה נער בתולה מארשה לאיש ומצאה איש בעיר ושכב עמה כב:כד והוצאתם את שניהם אל שער העיר ההוא וסקלתם אתם באבנים ומתו את הנער על דבר אשר לא צעקה בעיר ואת האיש על דבר אשר ענה את אשת רעהו ובערת הרע מקרבך {ס} כב:כה ואם בשדה ימצא האיש את הנער המארשה והחזיק בה האיש ושכב עמה ומת האיש אשר שכב עמה לבדו כב:כו ולנער לא תעשה דבר אין לנער חטא מות כי כאשר יקום איש על רעהו ורצחו נפש כן הדבר הזה כב:כז כי בשדה מצאה צעקה הנער המארשה ואין מושיע לה {ס} כב:כח כי ימצא איש נער בתולה אשר לא ארשה ותפשה ושכב עמה ונמצאו כב:כט ונתן האיש השכב עמה לאבי הנער חמשים כסף ולו תהיה לאשה תחת אשר ענה לא יוכל שלחה כל ימיו {ס} כג:א לא יקח איש את אשת אביו ולא יגלה כנף אביו {ס}

ii כד:ה כי יקח איש אשה חדשה לא יצא בצבא ולא יעבר עליו לכל דבר נקי יהיה לביתו שנה אחת ושמח את אשתו אשר לקח כד:ו לא יחבל רחים ורכב כי נפש הוא חבל {ס}

i B כא:יח כי יהיה לאיש בן סורר ומורה איננו שמע בקול אביו ובקול אמו ויסרו אתו ולא ישמע אליהם כא:יט ותפשו בו אביו ואמו והוציאו אתו אל זקני עירו ואל שער מקמו כא:כ ואמרו אל זקני עירו בננו זה סורר ומרה איננו שמע בקלנו זולל וסבא כא:כא ורגמהו כל אנשי עירו באבנים ומת ובערת הרע מקרבך וכל ישראל ישמעו ויראו {ס}

i B כג:ב לא יבא פצוע דכא וכרות שפכה בקהל יהוה {ס} כג:ג לא יבא ממזר בקהל יהוה גם דור עשירי לא יבא לו בקהל יהוה {ס} כג:ד לא יבא עמוני ומואבי בקהל יהוה גם דור עשירי לא יבא להם בקהל יהוה עד עולם כג:ה על דבר אשר לא קדמו אתכם בלחם ובמים בדרך בצאתכם ממצרים ואשר שכר עליך את בלעם בן בעור מפתור ארם נהרים לקללך כג:ו ולא אבה יהוה אלהיך לשמע אל בלעם ויהפך יהוה אלהיך לך את הקללה לברכה כי אהבך יהוה אלהיך כג:ז לא תדרש שלמם וטבתם כל ימיך לעולם {ס} כג:ח לא תתעב אדמי כי אחיך הוא לא תתעב מצרי כי גר היית בארצו כג:ט בנים אשר יולדו להם דור שלישי יבא להם בקהל יהוה {ס}

i B כד:ז כי ימצא איש גנב נפש מאחיו מבני ישראל והתעמר בו ומכרו ומת הגנב ההוא ובערת הרע מקרבך {ס}

ii כא:כב וכי יהיה באיש חטא משפט מות והומת ותלית אתו על עץ כא:כג לא תלין נבלתו על העץ כי קבור תקברנו ביום ההוא כי קללת אלהים תלוי ולא תטמא את אדמתך אשר יהוה אלהיך נתן לך נחלה {ס}

ii כג:י כי תצא מחנה על איביך ונשמרת מכל דבר רע כג:יא כי יהיה בך איש אשר לא יהיה טהור מקרה לילה ויצא אל מחוץ למחנה לא יבא אל תוך המחנה כג:יב והיה לפנות ערב ירחץ במים וכבא השמש יבא אל תוך המחנה כג:יג ויד תהיה לך מחוץ למחנה ויצאת שמה חוץ כג:יד ויתד תהיה לך על אזנך והיה בשבתך חוץ וחפרתה בה ושבת וכסית את צאתך כג:טו כי יהוה אלהיך מתהלך בקרב מחנך להצילך ולתת איביך לפניך והיה מחניך קדוש ולא יראה בך ערות דבר ושב מאחריך {ס}

ii כד:ח השמר בנגע הצרעת לשמר מאד ולעשות ככל אשר יורו אתכם הכהנים הלוים כאשר צויתם תשמרו לעשות כד:ט זכור את אשר עשה יהוה אלהיך למרים בדרך בצאתכם ממצרים {ס}

i C כב:א לא תראה את שור אחיך או את שיו נדחים והתעלמת מהם השב תשיבם לאחיך כב:ב ואם לא קרוב אחיך אליך ולא ידעתו ואספתו אל תוך ביתך והיה עמך עד דרש אחיך אתו והשבתו לו כב:ג וכן תעשה לחמרו וכן תעשה לשמלתו וכן תעשה לכל אבדת אחיך אשר תאבד ממנו ומצאתה לא תוכל להתעלם {ס}

i C כג:טז לא תסגיר עבד אל אדניו אשר ינצל אליך מעם אדניו כג:יז עמך ישב בקרבך במקום אשר יבחר באחד שעריך בטוב לו לא תוננו {ס}

i C כד:י כי תשה ברעך משאת מאומה לא תבא אל ביתו לעבט עבטו כד:יא בחוץ תעמד והאיש אשר אתה נשה בו יוציא אליך את העבוט החוצה כד:יב ואם איש עני הוא לא תשכב בעבטו כד:יג השב תשיב לו את העבוט כבוא השמש ושכב בשלמתו וברכך ולך תהיה צדקה לפני יהוה אלהיך {ס}

ii כב:ד לא תראה את חמור אחיך או שורו נפלים בדרך והתעלמת מהם הקם תקים עמו {ס}

ii כג:יח לא תהיה קדשה מבנות ישראל ולא יהיה קדש מבני ישראל כג:יט לא תביא אתנן זונה ומחיר כלב בית יהוה אלהיך לכל נדר כי תועבת יהוה אלהיך גם שניהם {ס}

ii כד:יד לא תעשק שכיר עני ואביון מאחיך או מגרך אשר בארצך בשעריך כד:טו ביומו תתן שכרו ולא תבוא עליו השמש כי עני הוא ואליו הוא נשא את נפשו ולא יקרא עליך אל יהוה והיה בך חטא {ס}

i D כב:ה לא יהיה כלי גבר על אשה ולא ילבש גבר שמלת אשה כי תועבת יהוה אלהיך כל עשה אלה {פ}

i D כג:כ לא תשיך לאחיך נשך כסף נשך אכל נשך כל דבר אשר ישך כג:כא לנכרי תשיך ולאחיך לא תשיך למען יברכך יהוה אלהיך בכל משלח ידך על הארץ אשר אתה בא שמה לרשתה {ס}

i D כד:טז לא יומתו אבות על בנים ובנים לא יומתו על אבות איש בחטאו יומתו {ס}

ii כב:ו כי יקרא קן צפור לפניך בדרך בכל עץ או על הארץ אפרחים או ביצים והאם רבצת על האפרחים או על הביצים לא תקח האם על הבנים כב:ז שלח תשלח את האם ואת הבנים תקח לך למען ייטב לך והארכת ימים {ס}

ii כג:כב כי תדר נדר ליהוה אלהיך לא תאחר לשלמו כי דרש ידרשנו יהוה אלהיך מעמך והיה בך חטא כג:כג וכי תחדל לנדר לא יהיה בך חטא כג:כד מוצא שפתיך תשמר ועשית כאשר נדרת ליהוה אלהיך נדבה אשר דברת בפיך {ס}

ii כד:יז לא תטה משפט גר יתום ולא תחבל בגד אלמנה כד:יח וזכרת כי עבד היית במצרים ויפדך יהוה אלהיך משם על כן אנכי מצוך לעשות את הדבר הזה {ס}

i E כב:ח כי תבנה בית חדש ועשית מעקה לגגך ולא תשים דמים בביתך כי יפל הנפל ממנו כב:ט לא תזרע כרמך כלאים פן תקדש המלאה הזרע אשר תזרע ותבואת הכרם {ס}

i E כג:כה כי תבא בכרם רעך ואכלת ענבים כנפשך שבעך ואל כליך לא תתן {ס}

i E כד:יט כי תקצר קצירך בשדך ושכחת עמר בשדה לא תשוב לקחתו לגר ליתום ולאלמנה יהיה למען יברכך יהוה אלהיך בכל מעשה ידיך {ס}

ii כב:י לא תחרש בשור ובחמר יחדו כב:יא לא תלבש שעטנז צמר ופשתים יחדו {ס}כב:יב גדלים תעשה לך על ארבע כנפות כסותך אשר תכסה בה {ס}

ii כג:כו כי תבא בקמת רעך וקטפת מלילת בידך וחרמש לא תניף על קמת רעך {ס}

ii כד:כ כי תחבט זיתך לא תפאר אחריך לגר ליתום ולאלמנה יהיה כד:כא כי תבצר כרמך לא תעולל אחריך לגר ליתום ולאלמנה יהיה כד:כב וזכרת כי עבד היית בארץ מצרים על כן אנכי מצוך לעשות את הדבר הזה {ס}כה:א כי יהיה ריב בין אנשים ונגשו אל המשפט ושפטום והצדיקו את הצדיק והרשיעו את הרשע כה:ב והיה אם בן הכות הרשע והפילו השפט והכהו לפניו כדי רשעתו במספר כה:ג ארבעים יכנו לא יסיף פן יסיף להכתו על אלה מכה רבה ונקלה אחיך לעיניך כה:ד לא תחסם שור בדישו {ס}